+ قبل ما تنزل سوق السيارات+

[b]نصايح للى ناوين ينزلوا سوق السيارات[/b]

[b]1:اول حاجه تعملها صلى ركعتين لله قبل ماتنزل وادعى ربنا يكرمك[/b]

[b]2:حاول تاخد معاك مبلغ صغير تربط بيه كلام عشان ماينفعش تخرج عربيه من السوق الا لما تكتب عقد ابتدائى وده بعد ما العربيه تعجبك وحاول تخبى المبلغ ده كويس عشان لاقدر الله السرقه[/b]

[b]3:حاول تاخد لفه تمام ولو عجبتك حاجه برضه لف تانى عشان هاتسمع اسعار مختلفه[/b]

[b]4:لو عايز تعرف العربيه بتاعت تاجر ولا خرج بيت (يعنى من مالكها) اساله رخصه ولا توكيل لو قالك رخصه تبقى العربيه بيتى لو توكيل اعرف انه تاجر وده عشان التسجيل بيبقى غالى والتوكيل ارخص فالتاجر بيعمل توكيل ويبيع بيه[/b]

[b]5:التجار بيبقى ليهم شكل مميز ولغه مميزه مثلا هاتلاقيه لابس طاقية الصيادين وليهم الفاظ مميزه مثلا (ياباشا الاتومبيل ده ايه وان مافيهوش كلمه)[/b]
[b](ياباشا العربيه دى دواخلها الماظ)[/b]
[b](بص ياباشا انا هاقولك ناهيتها)[/b]
[b]وشوية كلام تانى وعايز اوضح حاجه مش معنى كلامى ان التجار كلهم نصابين فى منهم كويس بس انا شخصيا مش بثق فى التعامل معاهم عشان بيبقى فى عربيات متبهدله وبيشدوها شده محترمه فانتا لو عايز تاخد من تاجر هات معاك عوكل الجن يتفرج على العربيه[/b]

[b]6:وانت فى السوق اول ماتقرب على عربيه هتلاقى اتنين تلاته جم جنبك والاشتغالات تبتدى ودول اغلبهم بيكونوا تجار لو العربيه عجبته هتلاقيه بيقولك (يالهوى العربيه مغيره عربيه)سيبك منه طبعا انتا ليك نظره ولو عايز يطمعك فيها هايقولك(العربيه دواخل الماظ)برضه سيبك منه وممكن تلاقيه بعد مانتا تسمع السعر ويعجبك مثلا 30000 تلاقيه يقول لصاحب العربيه انا هاخلص ب30500 طبعا انتا العربيه عجبتك فهتدفع اكتر وفى الاخر تكتشف ان الى قال السعر ده مع صاحب العربيه (قديمه)[/b]

[b]7:لو نازل لوحدك ماتخليش نضافة العربيه من بره تخدعك تلاقيها مش مكلفاه عشرين جنيه تمن الكومبوند(ملمع السيارات)وماتخليش نضافة الحوض يخدعك بيتغسل وبيرجع جديد وده بتعرفه من ريحة الجاز اهم حاجه بص على اساسيات العربيه وماتسمعش كلام الى يقولك وحياة عيالى يارب اعدمهم يارب مااوعى اروحلهم العربيه دى ماتلمست من جوه انتا الى هاتشترى فانتا الى تحكم وخلى بالك اسهل حاجه ممكن يتلعب فيها عداد الكيلومتر اوعى تتخدع بانه قليل وفى ناس بتقلله[/b]

[b]8:عند حرف الباب من جوه بيبقى فى برشام عامل زى السيليكون ده الفابريقه بيحطوه عشان المياه لو البرشام ده مفرقع تعرف ان الباب اتخبط لان البرشام ده استحاله يرجع زى الاول ودى طريقه سهله مش محتاجه صنعه والبرشام ده بيكون على حرف الابواب الاربعه وكمان الشنطه والكبوت[/b]

[b]9:وانتا بتفتح الكبوت حسيت انه تقيل زياده عن اللزوم اعرف ان الكبوت ده اترش والتقل ده بيكون من المعجون[/b]

[b]10:امسك خرطوم الفايز بتاع الموتور وخلى حد يزود لو خرج دخان ابيض يبقى الموتور خفيف[/b]

[b]واخيرا ياجماعه اى حاجه بقى ليها علاج يعنى دلوقتى العربيه لو مقلوبه ورشت دواخل بيدعكوا دواخلها بعد ماتترش ببطاس عشان يكوى ومايبانش انها ادهنت فخلى باللك واتفرج عالعربيه الف مره وبلاش تثق فى البنزينه [/b]

[b]وبكده اكون قولت اغلبية المعلومات الى عندى ولو افتكرت حاجه تانى مش هابخل عليكوا بيها ولو حد عنده أى استفسار انا موجود ولو حد حابب يعرف معلومات تانى عن عربيات مستعمله انا موجود وربنا يحفظنا من الغش

منقول لافاده [/b]